Обитель, Саракташ слайд 1 Обитель, Саракташ слайд 2 Обитель, Саракташ слайд 3 Обитель, Саракташ слайд 4 Обитель, Саракташ слайд 5 Обитель, Саракташ слайд 6 Обитель, Саракташ слайд 7 Обитель, Саракташ слайд 8

Поддержите проекты

Добровольное пожертвование на номер 3434

Дорогие друзья, теперь Вы можете отправить смс на короткий номер 3434  с любой суммой пожертвования.

Баннеры

Оренбургская епархия Журнал Православный Духовный Вестник
Свято-Вознесенский Макарьевский мужской монастырь Многодетная семья священника  Николая Стремского
Анализ сайта в поисковиках Святое Оренбуржье

Акафист Пресвятой Богородице в честь Ея иконы Табынская

Кондак 1

        Взбранной Воеводе рода христианскаго и страны нашея известней Избавительнице, хвалебныя песни принесем вернии Деве Владычице Богородице. Ты же яко имущая милосердие неизреченное, от всяких нас скорбных обстояний свободи, да с любовию зовем Ти: Радуйся, Похвало Табынская, и всего мира Надеждо и Утешение.

Икос 1

       Архангели и Ангели дивятся Твоему неизреченному милосердию к роду человеческому Дево Богородице, яко благоволила еси явити святую икону Твою близ града Казани, егда нечестивии агаряне воздвигоша брань на мирныя люди, разоряюще грады и веси их. Ты же Благая, хотящи утешити рабов Твоих пришествием Своим, скорбь их на радость преложила еси, сего ради вопием Ти таковая:

Радуйся, благословенная в женах.
Радуйся, обретшая благодать у Бога.
Радуйся, десницею Создателя благословенная.
Радуйся, Духом Святым освященная.
Радуйся, Мати Христа Бога нашего.
Радуйся, в рождестве и по рождестве Дева.
Радуйся, ангельских чинов удивление.
Радуйся, святых немолчное прославление. Радуйся, Похвало Табынская, и всего мира Надеждо и Утешение.

Кондак 2

      Провидящи Мати и Дево, беды и смятения окрест града Казани, явила еси святую икону Свою, наипаче же милость Свою, Владычице, людем, да не оскудеет вера, да не угаснет надежда, но да прославляется имя святое Отца, и Сына, и Святаго Духа вопиющими: Аллилуиа.

Икос 2

      По времени образ Твой честный Казанский во мнозех градех и весех страны нашея на дсках изображенный, прояви силу благодатную, истекающую чудотвореньми, тако и окрест веси Табынския близ Вознесенския обители святыя явися новый образ Твой: некогда диакон чернец, грядый из веси во святую обитель, услыша Твой глас: "Да потщится правоверная братия богоспасаемыя обители прияти Мя в храм Господа Моего". Убоявся прельщения, не внят неземному гласу сему, обаче  возвращаяся путем тем, паки услыша глас Твой: "Прииди и виждь". Уразумев, яко глаголи сии свыше суть, прииде на место, откуду слышан бысть глас сей и узрев святую икону Матере Божия, на камени велием близ горы Табынския у источника воднаго, возрадовася духом. Мы же, дивящеся сему, вопием Ти сице:

Радуйся, явлением святыя иконы Твоея милость Божию нам возвестившая.     
Радуйся, чистым сердцем глас Твой святый явившая.
Радуйся, Мати щедрот и милосердия.
Радуйся, милости сокровище многоценное.
Радуйся, с небесных высот на рабы Твоя призирающая.
Радуйся, покровом Твоим нас осеняющая.
Радуйся, яко милость Твоя посещает христианския веси и грады.       
Радуйся, яко милосердие Твое сердец наших отрада. Радуйся, Похвало Табынская, и всего мира Надеждо и Утешение.

Кондак 3

       Сила благодати Твоея осени сердце диакона благочестиваго, внегда узрети ему святую икону Твою, Владычице, и объят быв страхом величия Твоего, возрадовася зело, со тщанием востече во обитель и возвести братии о дивном обретении своем, радостно вопия Богу: Аллилуиа.

Икос 3

       Имущи, Пресвятая Дево, икона Твоя силу благодатную, яви иноком радость велию, егда познаша милости Твоя чрез икону Твою Табынскую людем являемыя, со страхом несоша святыню сию во обитель свою и поведаша о сем воеводе Уфимскому и ахиерею града Казани. Мы же благодарнии вопием Пресвятей Деве таковая:

Радуйся, помощь Свою всем притекающим к Тебе подающая.                
Радуйся, слез наших не отвергающая.
Радуйся, к Сыну Твоему моление о верных выну приносящая.                
Радуйся, прошения наша во благо исполняющая.
Радуйся, монашествующих покрове.
Радуйся, девствующих ограждение.
Радуйся, к Богу ума и сердца нашего направление.
Радуйся, душ наших спасение.
Радуйся, Похвало Табынская, и всего мира Надеждо и Утешение.

Кондак 4

        Буря крамолы воздвигнутыя от мятежник, наважденных Айдаром и Кусюмою, разори обитель Вознесенскую, братию же избивши, разсеятися понуди. Ты же, Всеблагая, хотящи по времени явитися во славе велией, сокрыла еси икону Свою чудотворную Табынскую. Мы же дивящеся таковому промышлению Твоему Владычице, вопием к Богу: Аллилуиа.

Икос 4

        Слышащи Богомати стенания рабов Твоих веси Табынския и видяще скорбь их, зане вера Христова поругаема бысть от неверных, в познание истины Христовыя и изобличение неверных благоволила еси паки второе явити на камени знамение, образ Твой честный светом Божественным озаренный. Мы же дивящеся таковому Твоему попечению о нас, вопием Ти сице:

Радуйся, явлением иконы Твоея Табынския свет истинныя веры земли Уфимстей даровавшая.                
Радуйся, суеверием и зловерием омраченных просветившая.                
Радуйся, грешных исправление.
Радуйся, кающихся с Богом примирение.
Радуйся, милость согрешившим являющая.
Радуйся, раны греховныя истребляющая.
Радуйся, скорбная сердца надеждою возраждающая.
Радуйся, лювовию их согревающая. Радуйся, Похвало Табынская, и всего мира Надеждо и Утешение.

Кондак 5

       Боготечную звезду святую икону Твою видеша нечестивии агаряне светящую на камени, но не разумеша Твоего Владычице пришествия, косни бо сердцем беша, ненавистию ко христианом распалившеся, надругашася над святынею. За таковое хуление святыни Твоея слепотою наказани бывше, блуждаху по лесу не ведуще пети: Аллилуиа.

Икос 5

      Видеша хулители святыни, яко зело наказани быша от Бога, обаче раскаятися не хотяху, ожесточени бо сердцем бяху, токмо един от них, лучем благодати Божией просвещенный, раскаявся и абие прозрев, возратися со единоплеменники своими ко святей иконе и слезно моляшеся пред нею. По молитве его Мати Божия всех исцели, сего ради вопием Пречистей:

Радуйся, торжество веры в стране нашей являющая.
Радуйся, святою иконою Твоею окамененная сердца  умягчающая.                
Радуйся, зловерия явное обличение.
Радуйся, истинныя веры утверждение.
Радуйся, рода христианскаго возвышение.
Радуйся, святыни присное ограждение.
Радуйся, яко Тобою беззаконие наказуется.
Радуйся, яко Тобою хула на Бога истребляется. Радуйся, Похвало Табынская, и всего мира Надеждо и Утешение.

Кондак 6

       Проповедницы Твоея благодати явившеся прозревшии магометане, возвестиша христианом веси Табынския о Твоем Богомати явлении, обаче крещения не прияша, токмо един прозревый, иже прият веру православную, возрадовася зело и рече всем притекающим ко источнику исцелений: "Се, ныне познах, яко велий есть Бог земли Российския", со умилением вопия Ему: Аллилуиа.

Икос 6

       Возсия свет божественный Владычице, егда святая икона Твоя с честию велиею пренесена бысть от места явления Своего в весь Табынскую, изливающи верным дары целебныя и всем подающи помощь и утешение с верою к Тебе во всяцей скорби притекающим и вопиющим таковая:

Радуйся, отчаянных прибежище.
Радуйся, скорбящих слышание.
Радуйся, печальных утешение.
Радуйся, христианом отрада и ограждение.
Радуйся, в бедах и печалех теплое заступление.
Радуйся, яко немощным даруеши укрепление.
Радуйся, скорбь нашу на радость претворяющая.
Радуйся, наветы вражия от нас отгоняющая. Радуйся, Похвало Табынская, и всего мира Надеждо и Утешение.

Кондак 7

      Хотяще вернии веси Табынския выну памятовати о чудеснем явлении иконы Твоея Владычице, сотвориша в честь дивныя Твоея иконы Табынския празднование в пяток девятый по Пасце, в день втораго явления Ея, благодаряще Заступницу усердную, Богу же воспевающе: Аллилуиа.

Икос 7

     Новое чудо явила еси Богородице, егда за беззакония людей праведный гнев Божий постиже град Стерлитамак, поразив их болезнию холерною, вернии же с благословения архиерея Иоанникия вземше святую икону Твою Богомати, Табынскую, принесоша ю в  свой град и слезно пред нею моляхуся. Егда же совершено бысть молебное пение, абие болезнь смертная остави град. Видяще же людие милость Твою Богородице, возопиша Тебе сице:

Радуйся, за люди согрешившия присно пред Сыном Твоим и Богом ходатайствующая.                
Радуйся, праведный гнев Божий на них движимый на милость преклоняющая.                
Радуйся, прекращением холеры благодатную силу иконы Твоея нам возвестившая.      
Радуйся, милость Божию и согрешившим явившая.
Радуйся, надеждо ненадежных.
Радуйся, опора немощных.
Радуйся, заблуждших на путь покаяния наставляющая.               
Радуйся, веру в жизнь будущаго века в них пробуждающая.               Радуйся, Похвало Табынская, и всего мира Надеждо и Утешение.

Кондак 8

        Странное чудо зрим о Тебе Богомати, егда икона Твоя Табынская принесена бысть во град Оренбург во время мора смертнаго, и токмо явися во граде сем святая икона Твоя, абие мор преста. Сего ради вернии града сего на коеждо лето ко дню Рождества Пресвятыя Богородицы с радостию велиею сретают святую икону Твою Табынскую, со умилением вопиюще: Аллилуиа.

Икос 8

      Весь недостойный грехми исполнихся, мирскому разсеянию вдахся, и о души своея вознерадех, обаче на святую икону Твою Владычице, взирая и просвещение от Нея безчисленным людем зде приходящим видя, паки на путь спасения устремляюся, и в радости сердца воспеваю Ти сице:

Радуйся, шествовати путем Господним нас научающая.               
Радуйся, на пути ко Господу нас укрепляющая.
Радуйся, жестокосердия искоренение.
Радуйся, милосердия в сердцах насаждение.
Радуйся, к подвигу целомудрия нас призывающая.
Радуйся, непорочных венчающая.
Радуйся, от земнаго богатства души верных отвращающая.              
Радуйся, духовными дарованьми молящихся обогащающая.                Радуйся, Похвало Табынская, и всего мира Надеждо и Утешение.
 

Кондак 9

         Вси людие земли Уфимския, егда праведный гнев Божий наказа их бездождием, со слезами моляху Заступницу христианскую испросити у Сына Своего и Бога, да оросит землю их дождием, и егда вернии веси Архангельския, вземше святую икону Табынскую, несоша ю на села своя, бысть дождь велий, на радость скорбящим и во утешение плачущим, да воспоют Господу благодарным сердцем: Аллилуиа.

Икос 9

      Ветий глаголы не довлеют ко изглаголанию чудес Твоих, Владычице Небесе, яко во утешение жителем Стерлитамака низпославши свыше дождь велий на землю, сим избавила еси град их от глада и запаления огненнаго, яко да истребится от лица скорбящих всякая печаль и всякая болезнь, сего ради вопием Ти:

Радуйся, обуреваемых тихое пристанище.
Радуйся, источниче милостей Господних.
Радуйся, унылых ободряющая.
Радуйся, моление скорбящих ко Господу возносящая.
Радуйся, ходатайством Твоим от зноя и жажды нас  спасающая.               
Радуйся, молитвами Твоими от запаления огненнаго избавляющая.                
Радуйся, алчущих питающая.
Радуйся, во мразех сущих согревающая. Радуйся, Похвало Табынская, и всего мира Надеждо и Утешение.
 

Кондак 10

       Спасти хотящи, Пресвятая Богородице, страждущаго трясовицею Василия воина от града Оренбурга, исцеление подала еси ему иконою Твоею Табынскою. Сей же воин во сне двукраты в весь Табынскую идяше и тамо Матерь Божию о исцелении моляше. Уразумев же в сониих волю Владычицы, пойде немощный двести тридесять поприщ, труждаяся и множицею на землю падая. Пришед же в весь Табынскую, егда погрузися во источник святый, идеже икона Твоя явися, абие исцелен бысть и радуяся и благодаря Матерь Божию, возопи ко Господу: Аллилуиа.

Икос 10

     Стена нерушимая веры явилася еси Богородице, боголюбивому отроку, имевшему части некия от камене, на немже явися икона Твоя, Владычице. Многим болящим помощь подала еси, егда бо сии, омывше частицы камене водою, пияху ю, и омываху ею раны своя и абие исцеление приимаху. Мы же благодать Твою видяще, зане и камени силу чудотворити даровала еси, вопием Ти сице:

Радуйся, сланые ключи целебною водою прославившая.              
Радуйся, иже камени, на немже явися святая икона Твоя Табынская, благодатную силу даровавшая.                               
Радуйся, всем с верою притекающим к цельбоносней иконе Твоей исцеление подающая.                
Радуйся, благодарение их ко Господу возносящая.
Радуйся, яко к помощи Твоей и маловернии притекают.               
Радуйся, яко повелением Твоим и разслабленнии со одра болезни востают.               
Радуйся, бесов изгнание.
Радуйся, помраченных умов просветление. Радуйся, Похвало Табынская, и всего мира Надеждо и Утешение.
 

Кондак 11

       Пение хвалебное возсылаху Тебе, Матери Божией, вси людие, стоящии во храме Твоем, видевше покаяние согрешившаго и милосердие Твое к нему: некий воин Гавриил за нарушение обета, даннаго Тебе, в разслаблении сый, исцелен бысть, егда святаго таинства елеосвящения сподоблься, к чудотворному образу Твоему припаде. Мы же, грешнии, многажды Господа грехми своими прогневляющии, молим Тя: и нам прощение грехов испроси со упованием поющим: Аллилуиа.

Икос 11

        Свет очесем даровала еси, Владычице, старице некоей, осмь лет во граде Оренбурзе слепотою страдавшей: та бо в сретение иконы Твоея идущи, сродницею своею оставлена бысть стеснения ради народа. Внезапу убо прозре и видящи икону Твою святую возрадовася зело, мы же со трепетом вопием Ти сице:

Радуйся, благодатная врачевания обильно источающая.                
Радуйся, исцелением недугов притекающих к Тебе веселящая.                
Радуйся, слепых прозрение.
Радуйся, глухих слышание, немых глаголание.
Радуйся, хромых хождение.
радуйся, вдов и сирот заступление.
Радуйся, душ наших освящение.
Радуйся, земнородных упование. Радуйся, Похвало Табынская, и всего мира Надеждо и Утешение.
 

Кондак 12

       Благодать Твою яви нам, Пресвятая Дево, молящимся Тебе пред честною иконою Твоею Табынскою, излей щедроты Твоя на грады и веси не токмо края Приуральскаго, но во всем мире честный образ Твой почитающим и поющим Богу: Аллилуиа.

Икос 12

         Поюще Твоя чудеса от иконы Твоея Табынския явленныя, молим Тя, Владычице, лика Твоего от страны нашея не отврати и всем приходящим к чудотворному образу Твоему и милости от Тебе ожидающим во благая вся прошения исполни, да вси воспоем Ти сице:

Радуйся, иконою Твоею благословение Божие краю нашему приносящая.               
Радуйся, источник Твой яко проповедник спасения веси Табынстей оставившая.                
Радуйся, смиренных сердцем боговедением просвещающая.               
Радуйся, славу Божию воспевати нас научающая.
Радуйся, к Тебе же и падшии в покаянии притекают.
Радуйся, яко призывающии имя Твое святое от падения греховнаго востают.              
Радуйся, в час смертный чтущих Тя не оставляющая.
Радуйся, и по смерти во обители небесныя души их сопровождающая.                 Радуйся, Похвало Табынская, и всего мира Надеждо и Утешение.
 

Кондак 13

          О Всепетая Мати Христа Бога нашего, приими молитвы раб Твоих и мир испроси всем, с верою и любовию притекающим ко иконе Твоей Табынстей, и живот вечный даруй им, со умилением поющим: Аллилуиа.

Сей кондак глаголи трижды, таже икос 1-й и кондак 1-й.

Молитва благодарственная ко Пресвятей Владычице нашей Богородице.

          О Пресвятая Владычице Богородице, Мати Господа нашего Иисуса Христа, непрестанная о нас пред Богом Молитвеннице и Ходатаице! О Мати наша Преблагая, всех нас при кресте Сына Твоего усыновившая! Благодарим Тя, безчисленная блага молитвою Своею нам испросившая. Благодарим Тя, множество икон Твоих чудотворных стране нашей даровавшая. Благодарим Тя, дивную икону Табынскую в годину скорбей краю Уральскому пославшая. На камени велием икону Свою нам явившая, молим Тя, окамененная сердца наша росою молитв Твоих умягчи. Милость Свою нам показавшая у источника воднаго, идеже болезни наша телесныя исцеляются, даруй нам потоки скорбных слез и очисти ими тимение грехов наших. У источника сланаго иконою Твоею святою благоволение месту сему показавшая, помози нам слово Господа Сына Твоего исполнити и солию земли быти. Лик Твой светлый нам, грешным, омраченным грехом явившая, просвети тьму грехов наших, освяти пути жизни нашея и приведи нас к тихому пристанищу в вечныя обители, уготованныя от Господа любящим Его. Аминь.

Молитва 2

ко Пресвятей Владычице нашей Богородице во всяком скорбном обстоянии.  

       О Пресвятая Владычице Дево Богородице! Приими мольбы от нас прилежно призывающих имя Твое и молящихся Тебе, покажи скорое Твое заступление, покажи яко можеши, яко Мати Бога. Призываем Тя от сердца со слезами припадающе пред Пречистым Твоим образом. О Божия Мати! Спаси нас и не даждь в расхищение супостатом, ниже да найдет на ны вся злая яже греси наши уготоваша нам, ниже беззакония наша да превзыдут главы наша. Виждь наша нестерпимыя печали, скорби, нужды, болезни, страсти: вооружися бо на ны лукавно враг языком якоже мечем, хотя нас погубити, но Ты Богородительнице крепостию Твоею предвари. Уста человеков, яко львов лютых отверзошася, во еже горце поглотити ны. Но Ты Мати Божия, явися надежда ненадеющимся и низложи крепость их, да узрят врази и постыдятся, да разумеют и видят Твою еже по нам сопротив борющую силу, и в пропасть преисподнюю низложи их. Да заградится всяк язык лукавым поучаяйся, да молчат устне льстивыя, и уста неправедно глаголющая на праведнаго беззаконие с гордынею и завистию враждебною вкупе. Призывающих Тя, Богородице, от души неложно во всякой скорби, и в болезнех различных, и в бедах лютых, спешно услыши Владычице, сих избавляющи присно молитвами Твоими: душ спасение, веры сохранение, от греховных навыков избавление, мирную христианскую кончину и Царствия Небеснаго наследие даруй нам. Да имя Твое, Богородице, на земли славословится, из Тебе бо возсия Христос Бог наш, грешником державную Надежду и Стену нерушимую Тя показав во веки веков. Аминь.
 

Тропарь, глас 4.

        Наста днесь пресветлый праздник, / Пречистая Дево, / честныя Твоея Табынския иконы, Владычице, / яже паче лучей солнечных возсия, / от Источника приснотекущаго, / Христа Бога нашего, / источаеши целебныя дары / с верою к Тебе притекающим, / Тя бо Христос помощницу людем Своим дарова, / покрывати и спасати от всякия беды рабы Своя, / Едину благословенную.

Кондак, глас 8.

        Взбранной Воеводе победительная, / яко избавльшеся от злых, / благодарственная восписуем Ти раби Твои Богородице: / но яко имущая державу непобедимую, / от всяких нас бед свободи, да зовем Ти: / Радуйся Невесто Неневестная.

Величание.

        Величаем Тя, / Пресвятая Дево, / Богоизбранная Отроковице / и чтем образ Твой святый, / имже точиши исцеления / всем с верою притекающим.

 

 

Акафист святому праведному Симеону, Верхотурскому чудотворцу.

Конда́къ 1.

Ра́дуйся, Симео́не, чудотво́рче преди́вный.

Икосъ 1.

Ангелъ во пло́ти и небе́сный человѣ́къ яви́лся еси́, блаже́нне Симео́не, а́нгельски бо въ мíрѣ се́мъ пожи́лъ еси́, тѣ́мже и а́нгельстіи чи́ни удиви́шася непоро́чности твоего́ житія́ и, по преставле́ніи твое́мъ, съ весе́ліемъ прія́ша пра́ведную твою́ ду́шу. Сего́ ра́ди и мы́, чудя́щеся высотѣ́ твое́й добродѣ́тели, прославля́емъ тя́ си́це:

Ра́дуйся, я́ко свя́то и богоуго́дно на земли́ пожи́лъ еси́; ра́дуйся, я́ко по́двигомъ до́брымъ здѣ́ подвиза́вся, тече́ніе свое́ пра́ведно сконча́лъ еси́.

Ра́дуйся, я́ко пресели́лся еси́ въ поко́ища небе́сная; ра́дуйся, я́ко въ оби́телехъ премíрныхъ, я́же угото́ва Бо́гъ лю́бящимъ Его́, на несконча́емыя вѣ́ки водворя́ешися.

Ра́дуйся, я́ко Ца́рь ца́рствующихъ прія́тъ тя́ въ небе́сное Ца́рствіе; ра́дуйся, я́ко при́сно со а́нгелы на небеси́ обита́еши.

Ра́дуйся, я́ко съ проро́ки и апо́столы вселя́ешися; ра́дуйся, я́ко съ по́стники и преподо́бными торжествова́ти сподо́бился еси́.

Ра́дуйся, я́ко предстои́ши ны́нѣ со всѣ́ми святы́ми престо́лу Бо́жію; ра́дуйся, я́ко Пресвяту́ю Тро́ицу несре́дственнѣ зрѣ́ти сподобля́ешися.

Ра́дуйся, я́ко неизрече́нную сла́ву Госпо́дню я́вственнѣ созерца́еши; ра́дуйся, я́ко тоя́ прича́стника бы́ти удосто́и тя́ Госпо́дь.

Ра́дуйся, Симео́не, чудотво́рче преди́вный.

Конда́къ 2.

Ви́дя вдови́цу зѣло́ пла́чущую, я́коже бо тогда́ умилосе́рдився, и ю́, изнемо́гшу тѣ́ломъ и бы́вшу бли́зъ коне́чнаго издыха́нія и очи́ма нима́ло зрѣ́ти могу́щу, яви́вся исцѣли́лъ еси́. Си́це и о мнѣ́ умилосе́рдися, уго́дниче Бо́жій, и отъ мно́гихъ грѣхопаде́ній немощству́ющее тѣ́ло мое́ исцѣли́ и ду́шу мою́ ко спасе́нію наста́ви, да въ ра́дости воззову́ къ Бо́гу пѣ́снь: Аллилу́ія.

 Икосъ 2.

Разумѣ́ти хотя́щу архіере́ю Сиби́рскія страны́ и́мя твое́, егда́ обрѣ́тены бы́ша святы́я твоя́ мо́щи, ты́ въ видѣ́ніи я́влься ему́, о и́мени свое́мъ возвѣсти́лъ еси́, о́нъ же, удиви́вся чудеси́ и просла́вивъ Бо́га, похва́льныя глаго́лы вѣща́я, вопія́ше тебѣ́ си́це:

Ра́дуйся, вели́кій пра́ведниче Бо́жій, въ чудесѣ́хъ просія́вый; ра́дуйся, цѣле́бниче неду́говъ всѣ́мъ, призыва́ющимъ тя́ съ вѣ́рою.

Ра́дуйся, я́ко и пре́жде проше́нія по́мощію предваря́еши; ра́дуйся, я́ко и недоумѣва́ющихъ о прославле́ніи нетлѣ́нныхъ моще́й твои́хъ чудесы́ твои́ми вразуми́лъ еси́.

Ра́дуйся, я́ко разсла́бленныхъ укрѣпи́лъ еси́; ра́дуйся, я́ко слѣпы́мъ прозрѣ́ніе дарова́лъ еси́.

Ра́дуйся, хромы́мъ хожде́ніе устроя́яй; ра́дуйся, отъ бѣсну́ющихся бѣсо́въ отгна́телю.

Ра́дуйся, ско́рбныхъ утѣ́шителю; ра́дуйся, ни́щихъ и убо́гихъ покрови́телю.

Ра́дуйся, правосла́вныхъ утвержде́ніе; ра́дуйся, ересе́й посрамле́ніе.

Ра́дуйся, Симео́не, чудотво́рче преди́вный.

 Конда́къ 3.

Си́ла Вы́шняго утверди́ тя́ въ житіи́ твое́мъ свято́мъ, и ты́ подвиза́лся еси́ о спасе́ніи души́ твоея́, труда́ми бо и воздержа́ніемъ увяди́лъ еси́ плотскíя стра́сти и въ непреста́нныхъ моли́твахъ твои́хъ всегда́ взыва́лъ еси́ къ Бо́гу: Аллилу́ія.

 Икосъ 3.

Имѣ́я милосе́рдіе мно́гое, о призыва́ющихъ тя́ съ вѣ́рою при́сно мо́лишися къ Бо́гу, у Него́ же равноа́нгельнымъ житіе́мъ твои́мъ вели́кое дерзнове́ніе стяжа́лъ еси́. Не пре́зри и на́съ, недосто́йныхъ, тре́бующихъ твоея́ по́мощи, и я́ко да́ры, пріими́ отъ на́съ пѣ́снь сію́:

Ра́дуйся, я́ко вся́, ели́ка про́сиши отъ Бо́га, да́руетъ ти́ Госпо́дь; ра́дуйся, я́ко моли́твы твоя́ о на́съ, я́коже кади́ло благово́нное, отъ Бо́га пріе́млются.

Ра́дуйся, я́ко возжада́ душа́ твоя́ къ Бо́гу Крѣ́пкому; ра́дуйся, Христа́ еди́наго возлюби́вый.

Ра́дуйся, я́ко невозвра́тнымъ жела́ніемъ послѣ́довалъ еси́ Ему́; ра́дуйся, добродѣ́тельное житіе́ всегда́ имѣ́вый.

Ра́дуйся, возненави́дѣвый стра́сти мíра сего́; ра́дуйся, маловре́меннаго утѣше́нія на земли́ не иска́вый.

Ра́дуйся, смиренному́дріемъ украси́выйся; ра́дуйся, тве́рдый адама́нте и сто́лпе непоколеби́мый прило́ги вра́жіими.

Ра́дуйся, я́ко нетлѣ́ніемъ тѣ́ло твое́ просла́ви Госпо́дь; ра́дуйся, я́ко отъ гро́ба твоего́ и пе́рсть пріе́млющіи исцѣля́ются.

Ра́дуйся, Симео́не, чудотво́рче преди́вный.

 Конда́къ 4.

Бу́ря недоумѣ́нія смуща́етъ мя́, ка́ко возмогу́ досто́йно воспѣ́ти чудеса́ твоя́, блаже́нне Симео́не? Кто́ бо мно́гихъ чудотворе́ній твои́хъ да́ры по досто́инству изрещи́ мо́жетъ? Оба́че и а́зъ ди́вно въ тебѣ́ прославля́ющемуся Бо́гу вопи́ти дерза́ю: Аллилу́ія.

 Икосъ 4.

Слы́шавше, блаже́нне и преди́вне Симео́не, о вели́чіи чуде́съ твои́хъ, я́ко моли́твами твои́ми су́щихъ въ бѣда́хъ и ско́рбехъ предваря́еши, ско́ро отъ ни́хъ избавля́я, вопіе́мъ тебѣ́ такова́я:

Ра́дуйся, избавле́ніе на́ше отъ печа́ли и скорбе́й; ра́дуйся, я́ко твои́мъ предста́тельствомъ да́руется духо́вная благода́ть всѣ́мъ, съ те́плою вѣ́рою къ тебѣ́ притека́ющимъ.

Ра́дуйся, я́ко твои́ми моли́твами ко́зни нечи́стыхъ духо́въ побѣждены́; ра́дуйся, я́ко и невѣ́дущимъ и неслы́шавшимъ о прославле́ніи твое́мъ исцѣле́ніе подае́ши.

Ра́дуйся, я́ко цѣле́бныя да́ры всю́ду то́чиши; ра́дуйся, я́ко страну́ Сиби́рскую при́сно присѣща́еши.

Ра́дуйся, ско́рый оби́димыхъ засту́пниче; ра́дуйся, су́щимъ въ лю́тыхъ обстоя́ніихъ посо́бниче и предста́телю.

Ра́дуйся, малоду́шныя утѣша́яй; ра́дуйся, неду́жнымъ крѣ́пкое исправле́ніе.

Ра́дуйся, плѣне́ннымъ ско́рое свобожде́ніе; ра́дуйся, грѣ́шнымъ ко спасе́нію наставле́ніе.

Ра́дуйся, Симео́не, чудотво́рче преди́вный.

Конда́къ 5.

Пресвѣ́тлая звѣзда́ яви́лся еси́, пра́ведный Симео́не: су́щихъ бо во тмѣ́ у́мныя о́чи озаря́я свѣ́томъ Ева́нгелія Христо́ва и избавля́я заблу́ждшихъ отъ сѣте́й змíевыхъ и отъ всѣ́хъ кова́рствъ его́, научи́лъ еси́ я́ благода́рственно и всера́достно съ ли́ки святы́хъ ко Христу́ Бо́гу вопи́ти: Аллилу́ія.

 Икосъ 5.

Ви́дѣвше въ житіи́ твое́мъ, блаже́нне, духо́вныхъ по́двиговъ твои́хъ высо́кая исправле́нія, вся́кій ра́зумъ удивля́ющая, прославля́емъ да́вшаго ти́ такову́ю благода́ть Бо́га, тебѣ́ же хвале́бными гла́сы си́це вопіе́мъ:

Ра́дуйся, я́ко юро́дъ бы́въ Христа́ ра́ди, высоту́ смиренному́дрія стяжа́лъ еси́; ра́дуйся, я́ко стра́нникъ и пришле́цъ на земли́ обрѣ́лся еси́.

Ра́дуйся, я́ко ны́нѣ граждани́номъ небе́снымъ бы́ти на несконча́емыя вѣ́ки сподо́бился еси́; ра́дуйся, я́ко незло́бивый а́гнецъ въ терпѣ́ніи твое́мъ бы́лъ еси́.

Ра́дуйся, я́ко кро́тостію ко озлобля́ющимъ тя́ зе́млю живы́хъ наслѣ́довалъ еси́; ра́дуйся, чи́стыми ду́шу и тѣ́ло твое́ сохрани́вый, и ны́нѣ чи́стымъ се́рдцемъ зря́й Бо́га.

Ра́дуйся, я́ко му́дрою мы́слію утверди́вый ду́шу твою́ во спасе́ніе; ра́дуйся, я́ко съ невозвра́тною наде́ждою бла́гъ вѣ́чныхъ преста́вился еси́ къ Бо́гу.

Ра́дуйся, я́ко десна́го стоя́нія удосто́ился еси́; ра́дуйся, я́ко не скры́лъ еси́ тала́нта, ввѣ́реннаго ти́ Бо́гомъ.

Ра́дуйся, благíй ра́бе и вѣ́рный, вше́дый въ ра́дость Го́спода своего́; ра́дуйся, я́ко ны́нѣ утѣша́ешися, я́коже дре́вній о́ный ева́нгельскій Ла́зарь, на ло́нѣ Авраа́мли.

Ра́дуйся, Симео́не, чудотво́рче преди́вный.

 Конда́къ 6.

Проповѣ́дника богоно́снаго Па́вла вѣща́ніе и глаго́лы исполня́я, Симео́не свя́те, юро́дственное Христа́ ра́ди на земли́ пожи́лъ житіе́, и болѣ́зни мно́гія претерпѣва́я, всегда́ благода́рственныя Бо́гу возсыла́лъ еси́ хвалы́, си́це глаго́ля Ему́: Аллилу́ія.

 Икосъ 6.

Возсія́лъ еси́ ве́ліе просвѣще́ніе свѣ́тлостію чуде́съ твои́хъ, пра́ведный Симео́не, отъ свята́го гро́ба твоего́ непреста́нно истека́ющихъ, и тѣ́мъ дале́че отгна́лъ еси́ тму́ ересе́й и раско́ловъ отъ окре́стныхъ мѣ́стъ, идѣ́же въ правовѣ́ріи и благоче́стіи подвиза́лся еси́ и въ нетлѣ́ніи тѣлеси́ почива́еши. Мы́ же, чудя́щеся си́мъ, взыва́емъ ти́ си́це:

Ра́дуйся, я́ко яви́лся во странѣ́ Сиби́рстѣй крѣ́пкій защи́тникъ Правосла́вія проти́ву развра́тниковъ и ху́льниковъ Христо́вы Це́ркве; ра́дуйся, я́ко и ны́нѣ борю́щимся съ ни́ми усе́рдный посо́бникъ обрѣта́ешися.

Ра́дуйся, проти́вниковъ святы́я Це́ркве посрами́телю; ра́дуйся, злы́хъ волко́въ отъ ста́да Христо́ва отгна́телю.

Ра́дуйся, облекíйся во ору́жіе свѣ́та; ра́дуйся, лука́вствующихъ обличи́телю.

Ра́дуйся, правосла́вныхъ ти́хое приста́нище; ра́дуйся, путеше́ствующихъ благо́е поспѣше́ніе.

Ра́дуйся, я́ко и отъ мно́гія ску́дости твоея́ разумѣва́лъ еси́ на ни́ща и убо́га; ра́дуйся, я́ко ми́лостивъ бы́въ при жи́зни, благотвори́ши всѣ́мъ тре́бующимъ и по сме́рти.

Ра́дуйся, я́ко избра́лъ еси́ до́брая, е́же Бо́га ра́ди тружда́тися; ра́дуйся, я́ко на тебѣ́ испо́лнися сло́во подви́жническое: болѣ́зненно, е́же тружда́тися, но блаже́нно воспрія́тіе.

Ра́дуйся, Симео́не, чудотво́рче преди́вный.

Конда́къ 7.

Хотя́щу нѣ́коему человѣ́ку отъ мно́гихъ враче́въ исцѣли́тися отъ очны́я болѣ́зни, и егда́ ничто́же успѣ́, прибѣ́гшу къ тебѣ́, врачу́ безме́здному, а ты́ о́чи его́, напо́лнены кро́вію и зрѣ́ти не могу́щая, пе́рстію внеза́пу исцѣли́лъ еси́. Онъ же возра́довався, благодаря́ше тя́ и, Бо́га прославля́я, рече́: Аллилу́ія.

 Икосъ 7.

Ди́вна тя́ показа́ на́мъ Творе́цъ и Госпо́дь всѣ́хъ чудотво́рца: егда́ бо нетлѣ́ніемъ просла́ви тѣ́ло твое́, тогда́ и земля́ не скры́ гро́бъ тво́й и яви́ всѣ́мъ на́мъ, я́ко многоцѣ́нное сокро́вище. Тѣ́мже и мы́, чудя́щеся, вопіе́мъ ти́ си́це:

Ра́дуйся, цвѣ́те нетлѣ́нный, въ странѣ́ Сиби́рстѣй прекра́сно процвѣты́й; ра́дуйся, до́блій подви́жниче благоче́стія, во гра́дѣ Верхоту́рстѣмъ возсія́вый.

Ра́дуйся, я́ко явля́ешися а́ки дре́во живо́тное, отъ него́же неду́гующіи получа́ютъ исцѣле́ніе; ра́дуйся, я́ко предста́тельствомъ твои́мъ предъ Бо́гомъ, а́ки вѣ́твь благосѣнноли́ственная, покрыва́еши на́съ.

Ра́дуйся, я́ко до́брѣ вкорени́лся еси́ въ вертогра́дѣ Христо́вы Це́ркве; ра́дуйся, я́ко оби́льные плоды́ добродѣ́телей прине́слъ еси́ Бо́гу.

Ра́дуйся, я́ко піе́ши ны́нѣ во́ду живо́тную отъ неисчерпа́емаго исто́чника безсме́ртія; ра́дуйся, заблу́ждшихъ наста́вниче.

Ра́дуйся, я́ко ка́ющимся въ согрѣше́ніихъ испроша́еши отъ Бо́га проще́ніе; ра́дуйся, всѣ́хъ благи́хъ на́мъ отъ Него́ хода́таю.

Ра́дуйся, я́ко свѣ́тлую оде́жду чистоты́ и цѣлому́дрія до́брѣ сохрани́въ, вше́лъ еси́ въ черто́гъ небе́сный; ра́дуйся, я́ко чи́стая душа́ твоя́ къ ли́ку ева́нгельскихъ му́дрыхъ дѣ́въ сопричте́ся и ку́пно съ ни́ми а́нгельски водворя́ется въ небе́сномъ черто́зѣ Жениха́ Христа́.

Ра́дуйся, Симео́не, чудотво́рче преди́вный.

 Конда́къ 8.

Стра́нное на земли́ житіе́ пожи́въ и удали́вся су́етнаго мíра, добродѣ́тельми къ Бо́гу прибли́жился еси́, сего́ ра́ди высо́кій Бо́гъ, ви́дя твое́ смире́ніе, возвели́чи тя́ Свое́ю благода́тію, Его́же восхваля́юще, пое́мъ Ему́ ку́пно съ тобо́ю а́нгельскую пѣ́снь: Аллилу́ія.

 Икосъ 8.

Ве́сь у́мъ тво́й въ вы́шній Іерусали́мъ при́сно простира́я, а́ще тѣ́ломъ и на земли́ пребыва́лъ еси́, вся́ кра́сная мíра сего́ возненави́дѣлъ и равноа́нгельное житіе́ здѣ́ пожи́лъ еси́, Симео́не блаже́нне, тѣ́мъ и отъ чту́щихъ тя́ слы́шиши сія́:

Ра́дуйся, человѣ́че Бо́жій досточу́дный; ра́дуйся, зерца́ло добродѣ́телей преизя́щныхъ.

Ра́дуйся, премѣни́вый тлѣ́нная настоя́щая на бу́дущая вѣ́чная; ра́дуйся, уподо́бивыйся Іову терпѣ́ніемъ.

Ра́дуйся, селе́ніе честно́е Святы́я Тро́ицы; ра́дуйся, свя́тче Бо́жій, со всѣ́ми святы́ми прославля́емый.

Ра́дуйся, ковче́же, отъ пото́па грѣхо́внаго призыва́ющихъ тя́ спаса́яй; ра́дуйся, я́ко услажда́лъ еси́ се́рдце твое́ весе́ліемъ бу́дущихъ бла́гъ.

Ра́дуйся, воздержа́ніемъ пло́ть твою́ изнури́вый; ра́дуйся, я́ко свя́тостію житія́ твоего́ ми́лость Бо́жію обрѣ́лъ еси́.

Ра́дуйся, я́ко непреста́нными моли́твами о на́съ Бо́га умилостивля́еши; ра́дуйся, я́ко благи́мъ наде́ждамъ твои́мъ исполне́ніе прія́лъ еси́.

Ра́дуйся, Симео́не, чудотво́рче преди́вный.

 Конда́къ 9.

Все́ мно́жество человѣ́ческое удиви́ся е́же на земли́ во пло́ти твоему́ терпѣ́нію и незло́бію, непоро́чна и пра́ведна тя́ зря́ще, и ны́нѣ ми́лостивымъ твои́мъ предста́тельствомъ въ ско́рбехъ на́съ не оставля́юща. Тѣ́мже и мы́, ра́дующеся, къ Бо́гу пое́мъ пѣ́снь: Аллилу́ія.

 Икосъ 9.

Витíи многовѣща́нныя изнемого́ша по досто́инству повѣ́дати мно́гое твое́ терпѣ́ніе и те́плую ко Хри́сту любо́вь. Азъ же, многогрѣ́шный, ка́ко возмогу́ изглаго́лати равноа́нгельное твое́ житіе́ и пресла́вная чудеса́? Но оба́че дерза́ю, надѣ́яся на твое́ беззло́біе, вопи́ти тебѣ́ си́це:

Ра́дуйся, я́ко а́нгеломъ подо́бяся, вы́ну пуща́лъ еси́ на не́бо о́чи твоего́ се́рдца; ра́дуйся, я́ко до́блими твои́ми по́двиги спасе́ніе и вѣне́цъ нетлѣ́нный отъ Христа́ Бо́га прія́лъ еси́.

Ра́дуйся, я́ко на вся́къ де́нь и на вся́ку но́щь славосло́вилъ еси́ Творца́ вся́ческихъ; ра́дуйся, я́ко побѣди́лъ еси́ діа́вола смире́ніемъ свои́мъ.

Ра́дуйся, я́ко ни́щь тѣ́ломъ и ду́хомъ бы́лъ еси́ на земли́, сего́ ра́ди угото́ва ти́ Госпо́дь Ца́рство небе́сное; ра́дуйся, кро́тости ра́ди твоея́ наслѣ́дивый зе́млю обѣтова́нія.

Ра́дуйся, я́ко и ины́хъ, зря́щихъ твою́ свя́тость, научи́лъ еси́ пра́ведно жи́ти; ра́дуйся, я́ко душе́вныя стра́сти исцѣля́еши.

Ра́дуйся, я́ко тѣле́сныя болѣ́зни врачу́еши; ра́дуйся, я́ко и многовре́менныя неду́ги отъ человѣ́къ отгоня́еши.

Ра́дуйся, я́ко су́щимъ бли́зъ коне́чнаго издыха́нія здра́віе да́руеши; ра́дуйся, я́ко и отъ смертоно́сныхъ я́звъ свобожда́еши.

Ра́дуйся, Симео́не, чудотво́рче преди́вный.

 Конда́къ 10.

Спасе́ніе восхотѣ́въ да́ти Госпо́дь лю́демъ Свои́мъ, свѣ́тлаго свѣти́льника всѣ́мъ на́мъ даде́ тебе́, точа́ща благода́ть цѣльбы́ всѣ́мъ, притека́ющимъ къ ра́цѣ моще́й твои́хъ. И мы́, получи́вше ми́лость отъ безме́зднаго тя́ врача́, благода́рными гла́сы восхваля́юще Бо́га, пое́мъ пѣ́снь: Аллилу́ія.

 Икосъ 10.

Стѣна́ еси́ ты́ и покро́въ всѣ́мъ притека́ющимъ къ тебѣ́, пра́ведный Симео́не: и́бо Госпо́дь просла́ви тя́, украси́въ нетлѣ́ніемъ и чудесы́ и приглаша́ти тебѣ́ научи́:

Ра́дуйся, сто́лпе непоколеби́мый Правосла́вія; ра́дуйся, сокро́вище неоску́дно мно́гихъ исцѣле́ній.

Ра́дуйся, пода́телю прося́щимъ у тебе́ я́же на по́льзу; ра́дуйся, уцѣлому́дривый живу́щія сту́дно.

Ра́дуйся, наказа́телю помраче́нныхъ умо́мъ; ра́дуйся, учи́телю смиренному́дрія и терпѣ́нія.

Ра́дуйся, я́ко въ со́ніихъ явля́яся, науча́еши до́брому житію́; ра́дуйся, звѣздо́, чуде́сно возсія́вшая въ Сиби́рстѣй странѣ́.

Ра́дуйся, я́ко луча́ми чудотворе́ній твои́хъ просвѣща́еши и далеча́йшія страны́; ра́дуйся, я́ко нѣ́когда незна́емь, ны́нѣ же со сла́вою познава́ешися отъ всѣ́хъ и́щущихъ тя́.

Ра́дуйся, я́ко ры́барь бы́въ, содѣ́лался еси́ ловце́мъ человѣ́ковъ; ра́дуйся, я́ко хода́тайствомъ твои́мъ къ Бо́гу му́къ вѣ́чныхъ свобожда́еши на́съ.

Ра́дуйся, Симео́не, чудотво́рче преди́вный.

 Конда́къ 11.

Пѣ́ніе умиле́нное приношу́ ти́, недосто́йный, и вопію́ со слеза́ми: хода́тайствуй за мя́ при́сно къ Бо́гу, душе́ю и тѣ́ломъ, отъ страсте́й вою́ющихъ на мя́, лю́тѣ неду́гующаго, и пода́ждь ми́ моли́твами твои́ми исцѣле́ніе и грѣхо́въ избавле́ніе, отъ се́рдца тебѣ́ сія́ принося́щему, да и а́зъ въ ра́дости воспою́ прославля́ющему тя́ Бо́гу пѣ́снь: Аллилу́ія.

 Икосъ 11.

Свѣтопріе́мную свѣщу́ зри́мъ тя́, богому́дре Симео́не: невеще́ственнымъ бо любве́ огне́мъ возже́глся еси́ и наставля́еши къ боже́ственному дѣя́нію вся́, о́бразомъ житія́ твоего́, я́ко заре́ю, просвѣща́я чу́вства на́ша, тѣ́мже и досто́инъ еси́ зва́ніемъ почита́тися си́мъ:

Ра́дуйся, луче́ пресвѣ́тлая, отъ Со́лнца Христа́ возсія́вшая; ра́дуйся, свѣти́ло благоче́стія немерца́ющее.

Ра́дуйся, я́ко свѣ́тъ прему́дрости Бо́жія просвѣти́ ду́шу твою́; ра́дуйся, я́ко вѣ́чнаго сего́ свѣ́та луче́й чрезъ тебе́ и мы́ сподобля́емся.

Ра́дуйся, безме́здный врачу́; ра́дуйся, я́ко источа́еши оби́льныя струи́ исцѣле́ній.

Ра́дуйся, благонаде́жный о на́съ предста́телю и моли́твенниче предъ престо́ломъ Госпо́днимъ; ра́дуйся, спаси́тельное приста́нище всѣ́мъ, притека́ющимъ къ тебѣ́.

Ра́дуйся, я́ко су́щимъ въ пучи́нѣ скорбе́й обрѣта́ешися ко́рмчій; ра́дуйся, те́плый засту́пниче су́щимъ во обстоя́ніихъ лю́тыхъ.

Ра́дуйся, благоуха́ніе духо́вное источа́яй отъ многоцѣле́бныхъ твои́хъ моще́й; ра́дуйся, еле́емъ ра́дованія исцѣля́яй ско́рби душе́вныя вѣ́рою моля́щихся тебѣ́.

Ра́дуйся, Симео́не, чудотво́рче преди́вный.

Конда́къ 12.

Благода́ть превѣ́лію даде́ тебѣ́ Госпо́дь неду́жныхъ болѣ́зни врачева́ти, де́моны прогоня́ти и стра́сти цѣли́ти, тѣ́мже не забу́ди и на́съ, усе́рдно призыва́ющихъ тя́ во вре́мя тѣ́сныхъ обстоя́ній и тя́жкихъ напа́стей, и моли́твами твои́ми отъ о́ныхъ изба́ви, да благода́рно вопіе́мъ къ Бо́гу: Аллилу́ія.

 Икосъ 12.

Пою́ще твоя́ чудеса́, пра́ведный Симео́не, вѣ́рою несомнѣ́нною притека́емъ къ многоцѣле́бнымъ и святы́мъ моще́мъ твои́мъ, и припа́дая къ ни́мъ, съ любо́вію и стра́хомъ лобыза́емъ о́ныя. Ты́ же, о свя́тче Бо́жій, я́ко благоутро́бный, принеси́ моле́ніе ко Влады́цѣ, да сподо́битъ на́съ десна́го стоя́нія на судѣ́ Свое́мъ, вопію́щихъ къ тебѣ́ сицева́я:

Ра́дуйся, вели́кій Христо́въ уго́дниче; ра́дуйся, моли́твенниче усе́рдный о воспѣва́ющихъ тя́.

Ра́дуйся, Бо́жій избра́нниче, благода́тію Ду́ха Свята́го пріосѣне́нный; ра́дуйся, пра́ведниче, возвесели́выйся о Го́сподѣ.

Ра́дуйся, я́ко мзда́ твоя́ мно́га на небесѣ́хъ; ра́дуйся, предста́телю на́шъ ско́рый и те́плый.

Ра́дуйся, хода́таю неусы́пный о на́съ предъ Бо́гомъ; ра́дуйся, и́го благо́е и бре́мя ле́гкое понесы́й.

Ра́дуйся, за труды́ твоя́ и по́двиги на земли́, вѣ́чное упокое́ніе обрѣты́й на небеси́; ра́дуйся, я́ко вре́менныхъ и вѣ́чныхъ бла́гъ отъ Бо́га на́мъ при́сно про́сиши.

Ра́дуйся, о ка́ющихся спору́чниче предъ Бо́гомъ; ра́дуйся, кади́ло благово́нное, облагоуха́ющее чту́щихъ тя́.

Ра́дуйся, Симео́не, чудотво́рче преди́вный.

 Конда́къ 13.

О, пречу́дный и ми́лостивый но́вый чудотво́рче, пра́ведный Симео́не! Пріими́ ны́нѣ ма́лое сіе́ моле́ніе на́ше и принеси́ е́ ко Христу́ Бо́гу на́шему, да сохрани́тъ на́съ отъ вра́гъ ви́димыхъ и неви́димыхъ, отъ наше́ствія иноплеме́нникъ, отъ неду́га и гла́да, отъ вся́кія ско́рби и внеза́пныя сме́рти и бу́дущаго вѣ́чнаго муче́нія изба́витъ, моли́твами твои́ми, всѣ́хъ вопію́щихъ къ Нему́: Аллилу́ія.

 

[Се́й конда́къ глаго́лется три́жды.
Та́же и́косъ 1-й: Ангелъ во пло́ти... И конда́къ 1-й: Избра́нному и ди́вному...]

 

Моли́тва свято́му пра́ведному Симео́ну Верхоту́рскому.

О, святы́й и пра́ведный Симео́не, чи́стою душе́ю твое́ю въ небе́сныхъ оби́телехъ въ ли́цѣ святы́хъ водворя́яйся, здѣ́ же тѣ́ломъ твои́мъ нетлѣ́нно почива́яй! По да́ннѣй ти́ благода́ти отъ Го́спода моли́тися о на́съ, ми́лостивно при́зри на на́съ многогрѣ́шныхъ, а́ще и недосто́йнѣ, оба́че съ вѣ́рою и упова́ніемъ притека́ющихъ ко святы́мъ и цѣльбоно́снымъ моще́мъ твои́мъ, и испроси́ на́мъ отъ Бо́га проще́ніе согрѣше́ній на́шихъ, въ ня́же впа́даемъ мно́жицею во вся́ дни́ живота́ на́шего и я́коже пре́жде о́вымъ у́бо отъ о́чныя зѣ́льныя болѣ́зни нима́ло зрѣ́ти могу́щимъ исцѣле́ніе оче́съ, о́вымъ же бли́зъ сме́рти бы́вшимъ отъ лю́тыхъ неду́говъ врачева́ніе, и ины́мъ ина́я мно́гая пресла́вная благодѣя́нія дарова́лъ еси́, си́це изба́ви и на́съ отъ неду́говъ душе́вныхъ и тѣле́сныхъ и отъ вся́кія ско́рби и печа́ли, и вся́ блага́я къ настоя́щему житію́ на́шему и къ вѣ́чному спасе́нію благопотре́бная на́мъ отъ Го́спода испроси́, да́ та́ко твои́мъ предста́тельствомъ и моли́твами стяжа́вше вся́ на́мъ поле́зная, а́ще и недосто́йніи, благода́рнѣ восхваля́юще тя́, просла́вимъ Бо́га, ди́внаго во святы́хъ Свои́хъ, Отца́ и Сы́на и Свята́го Ду́ха, ны́нѣ и при́сно и во вѣ́ки вѣко́въ. Ами́нь.

 

Тропа́рь на пренесе́ніе моще́й [12-го Септе́мврія], гла́съ 4:

Дне́сь ра́дуется сла́вная страна́ Сиби́рь, обрѣ́тши святы́я твоя́ мо́щи вну́трь себе́. Архіере́и, свяще́нницы и воево́ды и ве́сь со́нмъ людскíй, духо́внѣ веселя́щеся, вопіе́мъ ти́: о, богому́дре Симео́не, изба́ви на́съ, къ тебѣ́ прибѣга́ющихъ, отъ всѣ́хъ бѣ́дъ, прося́ пода́тися всѣ́мъ по коего́ждо проше́нію и изба́витися странѣ́ се́й и гра́ду отъ о́гненнаго запале́нія и пога́нскаго наше́ствія и междоусо́бныя бра́ни и отъ вся́каго зла́. Чту́ще же ны́нѣ честны́хъ и многоцѣле́бныхъ моще́й твои́хъ пренесе́ніе, но́вый цѣле́бниче, вси́ мы́ вопіе́мъ: сла́ва Да́вшему тобо́ю всѣ́мъ исцѣле́ніе.

 

Инъ тропа́рь, на прославле́ніе [18-го Деке́мврія], гла́съ 4:

Мірска́го мяте́жа бѣ́гая, все́ жела́ніе обрати́лъ еси́ къ Бо́гу, да въ видѣ́нія восхо́дъ обря́щеши горѣ́, и та́ко не уклони́вся въ лука́вствія се́рдца, но очи́стивъ ду́шу и тѣ́ло, прія́лъ еси́ благода́ть точи́ти цѣльбы́ вѣ́рнымъ и невѣ́рнымъ, притека́ющимъ къ ра́цѣ моще́й твои́хъ, Симео́не пра́ведне. Тѣ́мже, по да́нному ти́ да́ру, испроси́ у Христа́ Бо́га исцѣле́ніе на́мъ, боля́щимъ душе́вными страстьми́, и моли́ спасти́ ду́ши на́ша.

 

Конда́къ на пренесе́ніе моще́й [12-го Септе́мврія], гла́съ 4:

Наста́ дне́сь всечестна́я па́мять но́ваго цѣле́бника, пра́веднаго Симео́на, созыва́етъ же лю́ди въ пречестны́й хра́мъ свята́го Бо́жія архіере́я Никола́я, идѣ́же ра́достно соше́дшеся, благочести́выхъ мно́жества ве́село пра́зднуютъ пренесе́ніе честны́хъ и многоцѣле́бныхъ моще́й твои́хъ пра́здникъ. Ты́ бо яви́лся еси́ гра́ду на́шему и все́й Сиби́ри врачевство́ безме́здное, подава́я исцѣле́ніе съ вѣ́рою приходя́щимъ къ тебѣ́, Симео́не всеблаже́нне! Но, я́ко имѣ́яй дерзнове́ніе ко Влады́цѣ Христу́, Того́ моли́ спасти́ гра́дъ и лю́ди, моля́щіяся тебѣ́, па́че же хода́тай бу́ди ко Го́споду во дни́ наше́ствія печа́ли рабо́мъ твои́мъ, да зове́мъ ти́: ра́дуйся, Сиби́рстѣй странѣ́ похвало́ и утвержде́ніе гра́ду на́шему.

 

Инъ конда́къ на прославле́ніе [18-го Деке́мврія], гла́съ 2:

Мíра су́етнаго отве́рглся еси́, да бла́га вѣ́чныя жи́зни наслѣ́диши, возлюби́въ незло́біе и чистоту́ души́ и тѣ́ла. Сниска́лъ еси́, е́же возлюби́лъ, свидѣ́тельствуютъ бо о се́мъ гро́бъ и нетлѣ́ніе моще́й твои́хъ, и благода́ть чудотворе́нія наипа́че. То́чиши бо цѣльбы́ всѣ́мъ притека́ющимъ къ тебѣ́ и непросвѣще́ннымъ, Симео́не блаже́нне, чудотво́рче преди́вный.

 

Велича́ніе:

Ублажа́емъ тя́, святы́й пра́ведный Симео́не, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Акафист сщмч. Макарию Оренбургскому

Допущен к распространению Издательским советом Русской Православной Церкви
Присвоен номер Издательского совета -ИС Р15-423-1996
Автор: протодиакон Николай Терпугов, редактор Татьяна Тусина

Публикуется по изданию: Акафист священномученику Макарию Оренбургскому.  П. Саракташ: Свято-Троицкая Симеонова Обитель Милосердия: отдел по канонизации святых Оренбургской епархии, 2015.

Тропарь Кондак Величание

Конда́к 1

Избра́нному земли́ Росси́йския страстоте́рпцу  Христо́ву во́ину о и́мени Иису́сове да́же до кро́ве подвиза́вшемуся, тще́ту земну́ю презре́вшему и того́ ра́ди венце́м побе́ды на Небесе́х увенча́нному, па́стырю до́брому, Мака́рию иере́ю принесе́м похвале́ние: при́зри ны́не, о́тче святы́й, на правосла́вныя лю́ди оте́чества твоего́, и испроси́ блага́я вре́менная и ве́чная на́м, любо́вию тебе́ зову́щим:

Ра́дуйся, священному́чениче Мака́рие, ве́рный дру́же Христо́в и о все́м ми́ре моли́твенниче.

И́кос 1

А́нгельскому немо́лчному славосло́вию прича́стник ны́не явля́ешися, о́тче святы́й Мака́рие: ты́ бо еще́ сы́й в телеси́, о сла́ве Госпо́дней ре́вностию пла́менною испо́лнен показа́лся еси́, и да́же до после́дняго издыха́ния своего́ Христа́ Иису́са распя́таго пред безбо́жными враги́ испове́дати не устраши́лся еси́. Сего́ ра́ди приими́ от на́с похвалы́ сицевы́я:

Ра́дуйся, Бо́гом Вы́шним, созда́вшим тя́ по о́бразу Своему́, в подо́бие Его́ пресла́вно возведе́нный;

ра́дуйся, рабо́м благи́м и ве́рным от Него́ досто́йно нарече́нный.

Ра́дуйся, я́ко терпе́нием тесноты́ и лише́ний, Христу́, не име́вшему где́ главы́ подклони́ти, уподо́бился еси́;                        

ра́дуйся, я́ко Распя́тому на́с ра́ди на Дре́ве Кре́стнем, сораспя́тися не отре́клся еси́.

Ра́дуйся, я́ко терпе́нию твоему́ а́нгели удиви́шася;

ра́дуйся, я́ко незло́бием твои́м де́рзость мучи́телей низложи́ся.

Ра́дуйся, я́ко вре́меннаго ра́ди заключе́ния во узи́лище на земли́, врата́ Небе́сная тебе́ отверзо́шася;

ра́дуйся, я́ко вме́сто мра́ка темни́чнаго, невече́рняго дне́ сия́ние зре́ти ны́не сподобля́ешися.

Ра́дуйся, священному́чениче Мака́рие, ве́рный дру́же Христо́в и о все́м ми́ре моли́твенниче.

 

Конда́к 2

Прови́дя сла́ву Небе́сную, от Влады́ки Христа́ за и́мя Его́ пострада́ти хотя́щим угото́ванную, Богосло́в провеща́: «И́же приидо́ша от ско́рби вели́кия, и испра́ша ри́зы своя́, и убели́ша ри́зы своя́ в кро́ви А́гнчи: си́и су́ть пред престо́лом Бо́жиим и слу́жат Ему́ де́нь и но́щь в Це́ркви Его́, и Седя́й на престо́ле всели́тся в ни́х, и оты́мет Бо́г вся́ку слезу́ от о́чию и́х», да Подвигополо́жнику своему́ и Архиере́ю Вели́кому, в несконча́емыя ве́ки лику́юще, пою́т: Аллилу́иа.

И́кос 2

Ра́зум све́том Христо́вым, вся́каго челове́ка, гряду́щаго в ми́р просвеща́ющим, озаре́н име́л еси́, о́тче Мака́рие: ты́ бо от ю́ности еди́наго, е́же е́сть на потре́бу к жи́зни ве́чней, взыска́л еси́: возлюби́л еси́ селе́ние сла́вы Госпо́дни и красоту́ до́му Его́, в не́мже и са́м насажде́н бы́в, я́ко фи́никс процве́л еси́, и пло́д духо́вный во страда́нии свое́м стори́цею умно́жил еси́. Сего́ ра́ди вопие́м ти́:

Ра́дуйся, Мака́рие, величи́ю тезоимени́тый, вели́чие сла́вы Небе́сной чрез уничиже́ние земно́е обреты́й;

ра́дуйся, Ада́ма ве́тхаго тле́нность на нетле́ние во Христе́, но́вом Ада́ме, премени́вый.

Ра́дуйся, я́ко А́велевей чи́стей же́ртве подража́я, себе́ сама́го в же́ртву живу́ю Христо́ви принесы́й;

ра́дуйся, я́ко Но́ю пра́ведному подо́бяся, в хра́ме Бо́жием, а́ки в ковче́зе, от потопле́ния бу́ри жите́йския прему́дре сокры́лся еси́.

Ра́дуйся, я́ко со Илие́ю о сла́ве Бо́га И́стиннаго ревну́я, о исправле́нии наро́да твоего́ попече́ние неле́ностное име́л еси́;

ра́дуйся, со Иереми́ею се́туя, слеза́ми мно́гими о уничиже́нии и разоре́нии хра́мов Бо́жиих рыда́л еси́.

Ра́дуйся, я́ко Маккаве́ом поревнова́в, преще́ния мучи́телей не устраши́лся еси́;

ра́дуйся, я́ко Крести́телю после́дуя, во вну́треннюю пусты́ню се́рдца твоего́ от собла́знов ми́ра всели́лся еси́.

Ра́дуйся, священному́чениче Мака́рие, ве́рный дру́же Христо́в и о все́м ми́ре моли́твенниче.

 

Конда́к 3

Си́ла Вы́шняго в не́мощи челове́честей вои́стину соверша́ется: не в си́ле ко́нстей восхо́щет, но в боя́щихся Его́ де́йствует, е́же от вся́каго пути́ лука́ва возбрани́ти нога́ма и́х. Те́мже не на си́лу меча́, но на десни́цу Госпо́дню упова́ние возложи́в от шата́ния ми́ра лука́ваго сохране́н бы́л еси́, и осужде́ния с те́м избе́гл еси́, о́тче Мака́рие. Сего́ ра́ди на Небесе́х ны́не Спаси́теля своего́ прославля́я, зове́ши: Аллилу́иа.

И́кос 3

Име́яй бога́тство милосе́рдия и вся́ на по́льзу на́м устроя́яй, Всеблаги́й Бо́г коему́ждо челове́ку вре́мя и ме́сто жития́ земна́го прему́дре определи́л е́сть, да ве́рнии вси́ в терпе́нии кре́ст сво́й поне́сше, ко спасе́нию ве́чному благоприя́тно дости́гнут. Та́ко разуме́я, ты́, о́тче Мака́рие, никогда́же в ско́рбех мно́гих возропта́л еси́; оба́че отовсю́ду напа́стьми и треволне́нии обдержи́м сы́й, вся́чески благодаре́нию и стра́ху Бо́жию поуча́лся еси́. Сего́ ра́ди восхваля́ем тя́ си́це:

Ра́дуйся, благоче́стивыми роди́тели свои́ми во стра́се Бо́жием, е́же е́сть прему́дрости нача́ло, наста́вленный;

ра́дуйся, боже́ственнаго Писа́ния словесы́, а́ки водо́ю живо́ю, из рая́ теку́щею, сла́дце напое́нный.

Ра́дуйся, я́ко возлюби́вшаго тя́ до сме́рти Кре́стныя Христа́ от пеле́н младе́нческих преи́скренне возлюби́л еси́;                  

ра́дуйся, я́ко изде́тска во́зраста во хра́ме Госпо́дни, а́ки птене́ц во гнезде́ Орла́ Небе́снаго, воспита́нный.

Ра́дуйся, к стяжа́нию бога́тства крадо́маго и тле́ющаго се́рдца своего́ ника́коже прилепи́вый;

ра́дуйся, я́ко в ми́ре живы́й, мирски́ми пристра́стии не плени́лся еси́.

Ра́дуйся, я́ко слу́жбы уго́дником Бо́жиим воспева́я, путя́м и́х пра́вым прему́дренно поуча́лся еси́;

ра́дуйся, я́ко за́поведи Госпо́дни свя́то соблюда́я, с супру́жницею и ча́ды свои́ми дома́шнюю це́рковь соста́вил еси́.

Ра́дуйся, священному́чениче Мака́рие, ве́рный дру́же Христо́в и о все́м ми́ре моли́твенниче.

 

Конда́к 4

Бу́рю крепча́йшую воздви́же на Це́рковь Бо́жию и святы́х ея́ вра́г вселука́вый, возмне́в до конца́ хра́мы Госпо́дни разори́ти и святы́ни и́х поруга́нию преда́ти; оба́че ничто́же успе́: Вы́шний бо не в рукотворе́нных хра́мех живе́т, но ду́ши ве́рных рабо́в Свои́х во хра́мы Себе́ устроя́ет, да непреста́нно вопию́т Ему́: Аллилу́иа.

И́кос 4

Слы́ша в души́ своей ти́хий гла́с Бо́жий, призыва́ющий тя́ на де́лание в виногра́д Его́, не заме́длил еси́, но с ра́достию на стезю́ по́двига духо́внаго устреми́лся еси́, о́тче Мака́рие: ты́ бо, са́на свяще́нническаго и́го на себе́ прие́мый, зало́га благода́ти, тебе́ вруче́ннаго, ника́коже посрами́л еси́; сего́ ра́ди от благода́рныя па́ствы твоея́ приими́ похвалы́ сицевы́я:

Ра́дуйся, я́ко в хра́ме у престо́ла Бо́жия предстоя́, не усты́ то́кмо, но се́рдцем чи́стым Херуви́мскую пе́снь воспева́л еси́;

ра́дуйся, я́ко по глаго́лу моли́твенному, пред лице́м Госпо́дним вся́кое попече́ние жите́йское отлага́л еси́.

Ра́дуйся, я́ко де́нно и но́щно моли́твою и богомы́слием се́рдце твое́ исполня́л еси́;

ра́дуйся, я́ко словесы́ Ева́нгельскими, а́ки еле́ом Небе́сным, па́ству твою́ врачева́л еси́.

Ра́дуйся, я́ко Те́лом и Кро́вию Еди́наго Свята́го насыща́яся, благода́тию Бо́жиею, а́ки желе́зо во огни́, распаля́лся еси́;

ра́дуйся, я́ко Христу́, во смире́нии ученико́м но́зе умы́вшему, подража́я, и ты́ бли́жним свои́м служи́ти не возгнуша́лся еси́.

Ра́дуйся, среди́ но́щи зло́бы людски́я светолу́чною мо́лниею просия́вый;

ра́дуйся, я́ко А́гнец же́ртвенный уготовля́я, себе́ сама́го к заколе́нию му́ченическому приугото́вил еси́.

Ра́дуйся, священному́чениче Мака́рие, ве́рный дру́же Христо́в и о все́м ми́ре моли́твенниче.

 

Конда́к 5

Богогла́сная свире́ль уста́ твоя́ бя́ху, о́тче Мака́рие, егда́ ты́ во вре́мя и без вре́мени, небоя́зненно Бо́га Сло́ва, на́с ра́ди челове́к и на́шего ра́ди спасе́ния с Небе́с сше́дшаго, в слу́х лю́дем пропове́дал еси́, науча́я все́х, победи́вшему ми́р Спаси́телю на́шему пе́ти с тобо́ю ра́достно: Аллилу́иа.

И́кос 5

Ви́деша лю́дие Бо́жии дерзнове́ние и ре́вность твою́, я́же по Го́споде Вседержи́тели, в сла́дость слове́с твои́х послу́шаху, и доброде́телем твои́м подража́ти тща́хуся. Те́мже и мы́, в житии́ твое́м слове́с Ева́нгельских исполне́ние разуме́вше, со умиле́нием взыва́ем тебе́ си́це:

Ра́дуйся, нището́ю теле́сною искуше́нный, и того́ ра́ди блаже́нство нищеты́ духо́вныя позна́вый;

ра́дуйся, о лише́нии бога́тства тле́ющаго не скорбе́вый, но о сокро́вищи, в Небесе́х сокрыва́емем, при́сно воздыха́вый.

Ра́дуйся, стра́нник и пришле́ц, пу́ть земли́ проше́дый, кро́тости ра́ди в насле́дие го́рняго Иерусали́ма достиги́й;

ра́дуйся, а́лчбу и жа́жду теле́сную претерпе́вый, Хле́бом Жи́зни и Питие́м Безсме́ртия – Те́лом и Кро́вию Христо́вою – от гла́да духо́внаго сохране́нный.

Ра́дуйся, бли́жних свои́х зде́ ми́луя, на небесе́х ми́лость Бо́жию обреты́й;

ра́дуйся, се́рдце свое́ от собла́знов ми́ра сего́ чи́сто соблюды́й, и ны́не не я́ко в зерца́ле, но лице́м к лицу́ сла́ву Бо́жию созерца́еши.

Ра́дуйся, среди́ сму́ты междоусо́бныя лю́ди преде́рзыя умиря́ти тща́выйся, от Миропода́теля Емману́ила миротво́рец нарече́нный;

ра́дуйся, любве́ ра́ди ко Христу́ из до́ма своего́ изгна́нный, и блаже́нства ве́чнаго насле́дие стяжа́вый.

Ра́дуйся, священному́чениче Мака́рие, ве́рный дру́же Христо́в и о все́м ми́ре моли́твенниче.

 

Конда́к 6

Пропове́дник Бо́га Сло́ва воплоще́ннаго и во у́зах темни́чных неустраше́н яви́лся еси́, о́тче Мака́рие: в то́й бо ча́с даде́ся тебе́ от Ду́ха Бо́жия сло́во, ему́же не можа́ху проти́витися мучи́телие; оба́че, я́ко а́спид глухи́й, у́ши своя́ закрыва́ху и му́дрости Небе́сныя, от тебе́ изрече́нныя, не разумева́ху и с тобо́ю Зижди́телю своему́ пе́ти не можа́ху: Аллилу́иа.

И́кос 6

Возсия́ тебе́, блаже́нне Мака́рие, све́т слове́с Христо́вых: «Вся́к, и́же а́ще испове́сть Мя́ пред челове́ки, и Сы́н Челове́ческий испове́сть его́ пред а́нгелы Бо́жиими, а отверги́йся Мене́ пред челове́ки, отве́ржен бу́дет пред а́нгелы Бо́жиими». Си́х слове́с и́стину непрело́жную, в прославле́нии твое́м соверше́нную, зря́ще, мо́лим тя́, о́тче святы́й: сея́ блаже́нныя сла́вы прича́стники и на́с сотвори́, си́це восхваля́ющих тя́:

Ра́дуйся, от Христа́ Иису́са сладча́йшаго отрече́нием жи́знь вре́менную себе́ купи́ти не восхоте́вый;

ра́дуйся, бла́га земна́я превы́ше служе́ния Бо́гу и Це́ркви Его́ не поста́вивый.

Ра́дуйся, го́рьким сове́том фарао́на но́ваго, пе́рвенцы Це́ркви Христо́вы погуби́ти тща́щагося, пренебреги́й;

ра́дуйся, убива́ющих те́ло и ктому́ не могу́щих ли́шше что́ сотвори́ти, не убоя́выйся.

Ра́дуйся, со и́же от ве́ка страстоте́рпцами, А́гнцу, на Престо́ле сла́вы Седя́щему, в ри́зах бе́лых предста́ти сподо́бивыйся;

ра́дуйся, я́ко ю́ношам, в пещи́ Вавило́нстей Бо́га просла́вившим, пе́ния соприча́стник показа́лся еси́.

Ра́дуйся, я́ко Дании́лу, в ро́ве льви́ном крестообра́зно ру́це просте́ршему, сла́вы Кре́стныя спокло́нник яви́лся еси́;

ра́дуйся, я́ко не истука́ном ханаа́нским, но Бо́гу и́стинному на вся́к де́нь же́ртву хвале́ния возноси́л еси́.

Ра́дуйся, я́ко не сребро́м и зла́том, но кро́вию свое́ю ве́рность любве́ своея́ Соде́телю запечатле́л еси́.

Ра́дуйся, священному́чениче Мака́рие, ве́рный дру́же Христо́в и о все́м ми́ре моли́твенниче.

 

Конда́к 7

Хотя́й долготерпели́вый Всеви́дец Госпо́дь наивя́щшею сла́вою ве́рныя Своя́ рабы́ украси́ти, сквозе́ о́гнь и во́ду муче́ний в поко́й Небе́сный ты́я изве́л еси́: да вма́ле нака́зани бы́вше, вели́кими благоде́тельствовани бу́дут, и в ра́дости Ца́рства Бо́жия во ве́ки воспою́т: Аллилу́иа.

И́кос 7

Ди́вно и неудо́бь разумева́емо неве́рным бы́сть житие́ твое́, о́тче Мака́рие: а́ки бо со́лнце, в полу́дни заше́дшее, зри́шися, свя́тче Бо́жий, ско́рое тече́ние, е́же на сме́рть во́льную Христа́ ра́ди, соверша́я. Те́мже приими́ от на́с похвалы́ сия́:

Ра́дуйся, дово́льством мирски́м и ку́плями жите́йскими не обяза́выйся, да к Небе́сному во́инству сопричте́н бу́деши;

ра́дуйся, кро́тостию и незло́бием свои́м проти́ву духо́в зло́бы победоно́сец яви́выйся.

Ра́дуйся, страсте́м Христо́вым благода́рно покланя́выйся, по́слежде ча́шу страда́ний за И́мя Его́ испи́ти сподо́бивыйся;

ра́дуйся, ри́з свяще́ннических совлече́нный, в ри́зу раздра́нную за пору́ганнаго на́с ра́ди Христа́ облеки́йся.

Ра́дуйся, я́ко у́зы темни́чныя а́ки по́ручи но́вые к служе́нию Бо́гови восприял еси́;

ра́дуйся, я́ко пи́ща жесто́кая и ску́дная ны́не в сла́дость пи́щи нетле́нныя тебе́претвори́ся.

Ра́дуйся, я́ко ушеса́ твоя́, клеветы́ и хуле́ния слы́шавшия, а́нгельскаго пе́ния святы́ми гла́сы наслади́шася;

ра́дуйся, я́ко те́ло твое́, боле́зни и я́звы бие́ния претерпе́вшее, в прише́ствие Госпо́дне нетле́нною сла́вою безсме́ртия и красоты́ облече́тся.

Ра́дуйся, священному́чениче Мака́рие, ве́рный дру́же Христо́в и о все́м ми́ре моли́твенниче.

 

Конда́к 8

Стра́нно и неизглаго́ланно е́сть суде́б Бо́жиих та́инство: ели́ко бо отстои́т Не́бо от земли́, та́ко отстои́т Его́ пу́ть от путе́й на́ших, и размышле́ния на́ша от мы́сли Его́. Сего́ ра́ди диви́мся: ка́ко пра́ведницы непови́ннии, и́хже ве́сь ми́р не бе́ досто́ин, от сыно́в беззако́ния му́чими и умерщвля́еми бя́ху? Не мо́жем ума́ на́шего ску́достию похвалы́ досто́йныя судьба́м Про́мысла Его́ возда́ти; оба́че избра́нным страстоте́рпцем Его́ подража́ти тща́щеся, пе́ти дерза́ем: Аллилу́иа.

И́кос 8

Все́ми вы́шними и ни́жними влады́чествуяй Госпо́дь, зря́ в тебе́, о́тче Мака́рие, ве́ру кре́пкую, наде́жду несумне́нную и любо́вь и́стинную, моли́твы твоя́ вы́ну слы́шаше и проше́ния ско́ро исполня́ше: о́трока бо, рассу́дком омраче́ннаго исцели́, и сы́на твоего́, неду́гом тя́жким одержи́ма и на одре́ сме́ртнем лежа́ща, нежда́нною по́мощию ско́ро воздви́же. Мы́ же ны́не, ве́дуще тя́ и по сме́рти жи́ва су́ща, и у престо́ла Бо́жия предстоя́ща, заступле́ния твоего́ про́сим, зову́ще:

Ра́дуйся, о́тче Мака́рие, свещу́ ве́ры правосла́вныя в души́ свое́й не угаси́вый;

ра́дуйся, я́ко свети́льник горя́й и светя́й, на све́щнице амво́на церко́внаго просия́вый.

Ра́дуйся, да́нный тебе́ от Го́спода благода́ти тала́нт в земли́ нераде́ния не сокры́вый;

ра́дуйся, вертогра́д души́ своея́ безсме́ртныя чистоты́ и пра́вды цве́ты нетле́нными насади́вый.

Ра́дуйся, в моли́тве ве́лие дерзнове́ние имы́й, небе́сную по́мощь боля́щим ско́ро подава́вый;

ра́дуйся, я́ко и по сме́рти заступле́ния твоего́ прося́щим помога́ти не преста́л еси́.

Ра́дуйся, я́ко сбы́стся на тебе́ сло́во проро́ческое: «пра́ведницы во ве́ки живу́т и в Го́споде мзда́ и́х»;

ра́дуйся, я́ко и мы́ по глаго́лу апо́столову до́браго наста́вника своего́ благода́рне воспомина́ем тя́.

Ра́дуйся, священному́чениче Мака́рие, ве́рный дру́же Христо́в и о все́м ми́ре моли́твенниче.

 

Конда́к 9

Все́м естество́м, все́ю кре́постию, все́м помышле́нием твои́м Го́спода Иису́са Христа́ возлюби́л еси́, о́тче Мака́рие: не то́кмо е́же в Него́ ве́ровати, но и е́же по Не́м страда́ти сподо́бился еси́, и победоно́сец пресла́вный яви́лся еси́, непреста́нно Бо́гу вопия́: Аллилу́иа.

И́кос 9

Вети́я всеми́рный и учи́тель язы́ков Па́вел богоглаго́ливый известву́ет, я́ко ни гла́д, ни нагота́, ни беда́, ни ме́ч, ни настоя́щая, ни гряду́щая не возмо́гут разлучи́ти от любве́ Бо́жия избра́нных Его́. Те́мже зако́нно подвиза́вся, угото́ванный тебе́ вене́ц пра́вды от возлю́бленнаго тобо́ю и тя́ возлюби́вшаго Иису́са прия́л еси́; и от на́с, убо́гих, приими́ похвалы́ сия́:

Ра́дуйся, в вертогра́де Бо́жием – Це́ркви святе́й – от пе́рваго часа́ неле́ностно потруди́выйся;

ра́дуйся, измла́да свети́льник души́ своея́ Христо́ви возжги́й, еле́ем ми́лости де́л благи́х не оскуде́вый.

Ра́дуйся, мытаре́во смире́ние от ю́ности возлюби́вый, и те́м се́ти горды́ни фарисе́йския избежа́вый;

ра́дуйся, я́ко среди́ но́щи неве́рия душе́ю бо́дрствуя, Небе́сному Домовлады́це во сре́тение устреми́лся еси́.

Ра́дуйся, иска́тель до́браго би́сера вои́стину бы́вый, Ка́мень драги́й – Христа́ цено́ю жи́зни вре́менныя стяжа́ти удосто́ивыйся;

ра́дуйся, я́ко се́мя ве́ры правосла́вныя во дре́во жи́зни ра́йския израсти́вый.

Ра́дуйся, две́ри серде́чныя Го́сподеви прера́достно отве́рзый, И́же к тебе́ прише́д, черто́г Сво́й тя соде́ла;

ра́дуйся, я́ко и на́с ле́ности и нераде́ния испо́лненных приме́ром свои́м ко бла́гу устремлятися поуча́еши.

Ра́дуйся, священному́чениче Мака́рие, ве́рный дру́же Христо́в и о все́м ми́ре моли́твенниче.

 

Конда́к 10

Спасти́ хотя́ ду́шу свою́ от а́да преиспо́днейшаго, во вну́треннюю кле́ть серде́чную затворя́лся еси́, о́тче Мака́рие, и Отцу́ твоему́, И́же вта́йне, моли́твы и воздыха́ния сле́зная на вся́к де́нь приноси́л еси́. Те́мже и Оте́ц Небе́сный, ви́дяй та́йная, воздаде́ тебе́ я́ве: вме́сто земны́х – небе́сная получи́л еси́; вме́сто бла́г тле́ющих – сокро́вище нетле́нное; вме́сто жития́ многоско́рбнаго и сме́ртнаго – безсме́ртное ра́дование в раи́ невече́рнем; иде́же ны́не лику́я, пое́ши благи́х Пода́телю: Аллилу́иа.

И́кос 10

Ца́рь Небе́сный, все́м челове́ком хотя́й спасти́ся и в позна́ние и́стины приити́, яви́ тебе́, о́тче Мака́рие, в юдо́ли се́й плаче́вней адама́нта тве́рда и непобеди́ма от лица́ си́лы вра́жия: ты́ бо сто́лп зло́бы богопроти́вныя небоя́зненно обличи́л еси́, и собла́зна – е́же от Христа́ отрещи́ся и жи́ву бы́ти – не послу́шал еси́; и та́ко дре́вняго зми́я искуше́ние попра́в и Ада́ма ве́тхаго отри́нув, восле́д Ада́ма но́ваго, взе́м Кре́ст, поте́кл еси́. Мы́ же, на по́двиг тво́й взира́юще, зове́м:

Ра́дуйся, среди́ единоплеме́нник свои́х, а́ки а́гнец кро́ткий среди́ волко́в лю́тых пожи́вый;

ра́дуйся, я́ко ра́ди осмеяния и досажде́ния непра́веднаго слеза́ми свои́ми на вся́к де́нь посте́лю омоча́л еси́.

Ра́дуйся, я́ко сле́зы о́ныя весе́лие ве́чное тебе́ исхода́тайствоваша;

ра́дуйся, я́ко терпе́ние слове́с укори́зны вре́менныя сла́дость глаго́лов неизрече́нныя ра́дости принесе́ тебе́.

Ра́дуйся, я́ко пра́веден сы́й, непра́ведному суду́ без стра́ха предста́л еси́;

ра́дуйся, я́ко в смерте́льней ско́рби души́ твоея́ Подвигополо́жника Христа́ терпе́ние воспомина́л еси́.

Ра́дуйся, я́ко а́нгелом храни́телем укрепле́нный, ча́шу страда́ний до конца́ испи́л еси́;

ра́дуйся, сою́зом Христо́вы любве́ все́м от ве́ка пра́ведником увязе́нный, и со о́неми во све́тлостех святы́х водвори́выйся.

Ра́дуйся, священному́чениче Мака́рие, ве́рный дру́же Христо́в и о все́м ми́ре моли́твенниче.

 

Конда́к 11

Пе́ние похва́льное Бо́гу со слеза́ми мно́гими раствори́ша бли́жнии, наипа́че же ча́да твоя́, о́тче Мака́рие, егда́ узре́ша тя́ от беззако́нных свя́зана и из до́ма во узи́лище мра́чное без вины́ влеко́ма; тогда́ все́ упова́ние свое́ на благу́ю во́лю Госпо́дню возложи́вше, во умиле́нии вси́ возопи́ша: Аллилу́иа.

И́кос 11

Светоза́рным умо́м твои́м предзря́ Небе́сную сла́ву, ю́же угото́ва Бо́г лю́бящим Его́, вся́ во уме́ты вмени́л еси́, да Христа́ приобря́щеши; руга́ния и бие́ния, мра́к темни́чный и мра́з, и мно́гая лю́тая претерпе́л еси́, о́тче Мака́рие; научи́ и на́с, малоду́шных и немощны́х, адама́нтовой кре́пости души́ твоея́ досто́йныя принести́ похвалы́:

Ра́дуйся, я́ко еще́ младе́нец сы́й, в креще́нии Христу́ спогребы́йся, последи́ же и все́ те́ло свое́ Его́ ра́ди на убие́ние преда́вый;

ра́дуйся, себе́ до конца́ отверги́йся, и взе́м Кре́ст, Христу́, Учи́телю своему́, после́довавый.

Ра́дуйся, ча́шу страда́ний, ю́же Сы́н Бо́жий подаде́ тебе́, испи́вый;                

ра́дуйся, я́ко кро́ток и смире́н сы́й се́рдцем, зло́бою неи́стовствующим мучи́телем не противоглаго́лал еси́.

Ра́дуйся, супру́жницу и ча́да своя́ в ру́це Бо́жии преда́вый, и те́м на Про́мысл Его́ всеблаги́й наде́жду несумне́нную показа́вый;

ра́дуйся, в терпе́нии лише́ний многообра́зных И́ову уподо́бивыйся, того́ ра́ди на Небесе́х ны́не с ни́м утеше́ния сподобля́ешися.

Ра́дуйся, благода́тию свяще́нства апо́столом прее́мниче, в труде́х жития́ и кончи́не до́блий те́м подража́телю;

ра́дуйся, я́ко и бра́тиям, с тобо́ю во у́зах су́щим укрепле́ние ве́ры, наде́жды и любве́ у Бо́га проси́л еси́.

Ра́дуйся, священному́чениче Мака́рие, ве́рный дру́же Христо́в и о все́м ми́ре моли́твенниче.

 

Конда́к 12

Благода́ть дана́ ти́ е́сть от Бо́га, свя́те Мака́рие, я́коже и дре́вним о и́мени Христо́ве подви́жником: неду́ги челове́ческия ми́лостивно цели́ти, стра́сти прогоня́ти, от ну́жды и печа́ли избавля́ти. Ту́не прия́л еси́ сия́ от Даропода́теля Бо́га, ту́не и на́м убо́гим по́мощь и вразумле́ние низпосли́, благода́рно Ему́ вопию́щим: Аллилу́иа.

И́кос 12

Пое́ши ны́не Святе́й Тро́ице пе́снь побе́дную, страстоте́рпче святы́й Мака́рие, пре́жняя бо вся́ мимоидо́ша: рыда́ние, жа́лость и го́ре и стра́х сме́ртный; претерпева́я же сия́, о убива́ющих тя́ моли́лся еси́. Сего́ ра́ди со дерзнове́нием ве́лиим ста́л еси́ пред лице́м озлобля́вших тя́, и по́двиги твоя́ презира́вших: мучи́телие бо твои́ ны́не ви́дяще тя́, смуща́ются стра́хом ве́лиим, и глаго́лют в себе́: «Се́й бе́, его́же име́хом не́когда в посме́х, и в при́тчу поноше́ния. Безу́мнии житие́ его́ вмени́хом неи́стово, и кончи́ну его́ безче́стну. Ка́ко вмени́ся в сыне́х Бо́жиих, и во святы́х жре́бий его́ е́сть?». Е́й, о́тче святы́й, непамятозло́бив сы́й, проле́й те́плую моли́тву о сына́х заблу́ждших Оте́чества на́шего, да приведе́т Госпо́дь все́х на́с на пу́ть ми́ра и братолю́бия, тебе́ же, засту́пнику на́шему и хода́таю, да научи́т пе́ти:

Ра́дуйся, пра́вды ра́ди изгна́нный, мзду́ трудо́в твои́х стори́цею на Небеси́ получи́вый;

ра́дуйся, за Главу́ Це́ркве – Христа́ пред мучи́тели и уби́йцы твои́ми главу́ во смире́нии преклони́вый.

Ра́дуйся, си́лою непобеди́мою свы́ше на бра́нь проти́ву си́л преиспо́дних препоя́санный;

ра́дуйся, победоно́сною сла́вою в вы́шних от Христа́ – Победи́теля сме́рти облече́нный.

Ра́дуйся, в кни́зе жи́зни у А́гнца Бо́жия наве́ки запечатле́нный;

ра́дуйся, невече́рняго дне́, иде́же Со́лнце Пра́вды сия́ет, достиги́й.

Ра́дуйся, олтаря́ Небе́снаго злата́я кади́льнице, фимиа́м моли́твы о на́с Бо́гу принося́щая;

ра́дуйся, я́ко моли́твами твои́ми храни́ми и наставля́еми, всежела́ннаго Ца́рства Бо́жия дости́гнути и мы́ гре́шнии упова́ем.

Ра́дуйся, священному́чениче Мака́рие, ве́рный дру́же Христо́в и о все́м ми́ре моли́твенниче.

Конда́к 13

О, всехва́льный и честны́й иере́ю, страстоте́рпче Христо́в Мака́рие! Ма́лое сие́ моле́ние, на́ми недосто́йными тебе́ от любве́ приноси́мое, любе́зно прие́м, о́бщее с тобо́ю на́ше Оте́чество от все́х неприя́зненных нападе́ний и вра́жиих наве́тов невреди́мо соблюди́, от гла́да и па́губы лю́ди изба́ви, ми́ру умире́ние испроси́, да ти́хое и безмо́лвное житие́ во благоче́стии и чистоте́ пожи́вше, непреста́нно благоде́ющему на́м Бо́гу хвале́бно зове́м: Аллилу́иа.

(Этот кондак читается трижды, затем 1-й икос и 1-й кондак.)

 

Моли́тва

О святы́й и всехва́льный уго́дниче Бо́жий, священному́чениче Мака́рие! Подвиза́вся в земли́ на́шей Оренбу́ржстей, де́лы благи́ми зело́ украси́лся еси́: моли́твою непреста́нною, труда́ми мно́гими о благоле́пии церко́внем, и е́же о па́стве твое́й попече́нием Бо́гу угоди́л еси́; наипа́че же по́двигом страда́ния твоего́ за Христа́ да́же до сме́рти И́мя Его́ на земли́ просла́вил еси́! Мо́лим тя́ ны́не, сро́дницы твои́ су́ще: исхода́тайствуй у Влады́ки долготерпели́ваго и всеми́лостиваго Го́спода на́шего Иису́са Христа́ все́м вся́ ко спасе́нию поле́зная: наро́дом Оте́чества на́шего ми́р и к позна́нию Бо́га И́стиннаго ра́зум све́тлый; земли́ Росси́йстей от наше́ствия супоста́т кре́пкое защище́ние; прави́телем му́дрость и вразумле́ние; боля́щим исцеле́ние, плене́нным свобожде́ние, от гла́да и земли́ трясе́ния сохране́ние. Все́м же на́м, о́тче святы́й, да́руй дру́г ко дру́гу любо́вь, я́ко да не и́менем то́кмо, но и са́мым де́лом христиа́ны яви́мся, и в ми́ре доброде́тельное поживе́м житие́ во вся́ком благоче́стии и чистоте́. О, моли́твенниче на́ш те́плый, страстоте́рпче Христо́в Мака́рие! Ты на земли́ живы́й, никого́же презира́л еси́, но и ко враго́м свои́м ми́лостив бы́л еси́; те́мже ны́не, во Ца́рствии Отца́ на́шего на Небеси́ водворя́яся и неизрече́нныя любве́ и благода́ти Его́ наслажда́яся, не забу́ди на́с, убо́гих и немощны́х, твоея́ по́мощи и утеше́ния прося́щих! Да не поги́бнем до конца́, злы́ми на́выки, а́ки пу́тами кре́пкими, окова́ни су́ще и от вселука́ваго врага́, а́ки приста́вника лю́таго, зело́ стужа́еми. Сего́ ра́ди при́зри ми́лостивно, свя́тче Бо́жий, и во обстоя́нии су́щим на́м ру́ку по́мощи ско́ро простри́. На вся́к де́нь мы́сль бла́гу, е́же до́брое твори́ти, в сердца́ на́ша вложи́. Моли́тве умносерде́чней, терпе́нию без ропта́ния и смире́нию нелицеме́рному на́с научи́. Наипа́че же да́руй на́м стра́х Бо́жий, и́же е́сть вся́кия прему́дрости нача́ло, да те́м руководи́ми, вся́ за́поведи Христо́вы ле́гце исполня́ти навы́кнем, и в Не́м вси́ еди́но бу́дем, и невече́рняго дне́ Ца́рствия Его́ дости́гнем, иде́же в ра́дости духо́вней се́рдца, покая́нием очище́ннаго, просла́вим Отца́ и Сы́на и Свята́го Ду́ха, Еди́наго в Тро́ице Святе́й сла́вимаго Бо́га, во ве́ки веко́в. Ами́нь.

 

 

Тропа́рь, глас 3:

Це́ркве Ру́сския сто́лпе непоколеби́мый,/ благоче́стия пра́вило,/ жития́ ева́нгельскаго о́бразе,/ священному́чениче Мака́рие,/ Христа́ ра́ди пострада́вый да́же до кро́ве,/ Его́же моли́ усе́рдно,/ я́ко Нача́льника и Соверши́теля спасе́ния,/ Русь Святу́ю утверди́ти в Правосла́вии// до сконча́ния ве́ка.

Конда́к, глас 2:

Восхва́лим, ве́рнии,/ изря́днаго во свяще́нницех,/ и сла́внаго в му́ченицех Мака́рия,/ Правосла́вия побо́рника и благоче́стия ревни́теля,/ земли́ Ру́сския кра́сное прозябе́ние,/ и́же страда́нием Небесе́ дости́же/ и та́мо те́пле мо́лит Христа́ Бо́га// спасти́ся душа́м на́шим.

Велича́ние:

Велича́ем тя,/ священному́чениче Мака́́рие,/ и чтем святу́ю па́мять твою́:/ ты бо мо́лиши за нас// Христа́ Бо́га на́шего.

 

Календарь событий

Сентябрь 2019
Пн Вт Ср Чт Пт Сб Вс
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6

Православный календарь



Евангельские чтения

Святые дня

2005 © 2017 Официальный сайт Свято-Троицкой Симеоновой Обители Милосердия, п.Саракташ

facebook
vkcom
google
odnoklassniki